Convención de Pueblos Indigenas 2011 - Runa Simipi rimarisun

PRIMERA CONVENCIÓN DE
“PUEBLOS INDÍGENAS”



Lima-Perú, 08 de Enero del 2011

¡¡Indio hinata ñak`arichiwark`anchis,

Indio hinallataqmi sayarikusum!!

¡¡Indio fue el nombre con el que nos sometieron,

Indio será el nombre con el que nos liberaremos!

Hanan kollasuyu (Puno), 08 de Enero del 2011


NOK`AQ RIMAYNIY,
KAY JUÑUKUY UK`UPI, ESK`ON PUNCHAY MOSOK KILLAPI, ISKAY WARANK`A CHUNKAUKNIYUK WATAPI

Aureliano Turpo Choquehuanca
E-Mail: turaschay@yahoo.com

Wayk`eykuna,

Panakuna,
Runa Masiykuna,

Kay k`elk`ayta k`ankunaman puririchini, wauk`enchis Alberto Pizango, juñukuyninchista mañakun (Lima, 8-Enero-2011). Chay waj`akuyta uyarispa, kay k`elkayta k`ankunapaq k`elk`aykuni. Hanan Kollasuyu llaqtanchismanta pacha (Puno), kechuakuna, aymarakuna, k`oñi runakuna, kausayninta munaspa juñurikusun, wauk`enchiskunata uyarispa; mistikunaq munayninta supayman aparichinanchispak. Chayrayku nok`anchis mana k`onk`ananchischu Juan Santos Atawallpa, Tupak Amaru II, Pedro Willka Apaza, hatun mak`anakuyninta hatun kausayninchispaq. Tawa pachaq esk`on chunka esk`on niyuq wataña ñak`ariskanchis, Pizarroq, Toledoq munayninkumanta pacha (1572).

Hallpa mamanchis manaña hallintachu p`uturinñachu, chayrayku nok`anchis mana hallín kausay uk`upiñachu kausasianchis. Republica nisk`api, españolkunaq wawankuna ñak`ariy uk`upi kausachiwanchis, paykunataq k`apak tukupunku llank`ayninchiswan. Kamachikuq yuraq runakuna, gobiernumanta pacha, paykunallan hallín kausay uk`ullapi tiyarikunku, nok`anchispaktaq ñak`ariylla kan.

Kunan punchaypi, kay juñukuy uk`upi, llekwinchista tusurichisun, hichapis chaywan Hatun Tawantinsuyu llaqtanchista kausarichisunchis. Chay kausarichiyk`a makinchispi kaskan, chayrayku hallinta rimananchis hatun kausayninchispak. Kunan mistikunak`a ll`ok`e larumanta, paña larumanta rimariskankuña, imaynatas kay Perú sutichask`ata, paykuna gobernank`aku. Chayk`a mana nok`anchispaq sorpresañachu, yachanchisña imaynata suwakunku llaqtanchispak k`olk`enta, chayrayku ñak`ariy uk`ullapi kausasianchis.

Belaúnde Terry, Morales Bermúdez, Alan García, Fujimori y Toledo (1956-2011), k`alallan kanku gringukunaq MIT`ANIN, chayrayku paykunak`a hallín kausayniyuk kanku, nok`anchist`ak mana k`olkeyuqkchu kanchis, mana llank`aywan kausanchis, mana hallín k`awarisk`achu Kanchis, onk`osk`alla pornak`anchis, mana hallín k`elk`ayta yachanchischu. Paykunalla hallín yachay wasiman purinku, wak karu llaqtakunaman (EE. UU.), chaymanta kutimuspataq mistikunallapak llank`arinku, nok`anchismantataq mana llakirikunkucho, ñak`ay uk`ullapi tiyachiwanchis kunankama. CHAYK`A TUKUKUNAN.

Sichus chayta munanchis, chulla sonk`ollawan, chulla llekwillawan, chulla makillawan, chulla runa ginalla puririsun HATUN KAUSAYMAN. Chaypak nok`anchis, uk rimayta, k`elk`arisun, wauk`eyninchiskuna, pananchiskuna kausayninchista congresuman aparinampak, gobiernok wasinman chayananchispak ama llullakusunchu, ama suwakusunchu, ama cheknikusunchu, ch`ulla llaqtalla hina t`askirisun.

Hatun T`inkunamanta p`uturinan hatun kamachikuy, mana huchuy juñukuymantak`a, llok`e rimaykunamanta, pañarimaykunamanta lloksinanchu. Nok`anchis munayninchiskunata chay ll`ok`e runakunak`a hanchataña llullarikunku, nok`anchistak chay llullakuyta, sut`ipis kanman hinata chaskirinchis.

Kay Jullaka llaqtanchismanta pacha, Hanan Kollasuyu, suyunchismanta pacha (Puno), aswan karu llaqtanchismanta pacha, k`alan k`arikunata, warmikunata, sipaskunata, makt`akunaman nirisak, kay juñukuy uk`upi hallinta rimariychis. ALBERTO PIZANGO, wauk`eyninchis sut`illanta rimarichun, sichus pay presidente kayta munan, congresuman chayayta munan chayk`a, ¿ima rimaywan, ima organizaciumwan t`askirink`a? ¿Imatat´ak nok`anchispak rurayta munan? ¿Imanank`atak mistikunak kausayninkunawan? ¿Socialista andino-amazónico llaqtatachu ll`ankayta munan? Chayllata tapurikuna kay juñukuy uk`upi, chaypakchu o imapakchu chay juñukuy kan.

Hanan Kollasuyu suyunchispi (Puno), ñaupak watakunapiña, (1975-1985), organizaciunta puririchirk`anchis, Movimiento Indio Pedro Willka Apaza, sutichask`ata; chay purnak`ay uk`upi mistikunak`a, wak organizaciunta puririchinku, Putina kani nispa, indigina kani nispa, originario kani nispa, hatun llullakuywan pornak`anku, ONG makinkunamanta, chulla rimaynillawan. Chay rimayk`a kask`a, mana k`echuakunata, aymarakunata, k`oñi llaqtakuna runa kunata, hallín kauysayman purinanta munask`ankuchu.

Chayrayku, kay juñukuy uk`upi ama llullakunachu, sichus hallín kausayta p`uturichista munanchis chayk`a, hichapis hallpa mamanchis wakmanta p`ok`orinman nok`anchispak, kausayninchispaq. Manaña llullakunata munanchischu; nok`anchismanta manaña rimayta atinkuñachu, nisutaña llullankunawan ñak`arichiwanchis. Chayk`a tukukunan kuna, wak kausayta sichus munamchis k`alan llaqta masinchikunapaq.

Wauk`eykuna,

Panaykuna,

Llaqta masiykuna,

Kay hatun t`inkuman hamuqkuna, rimayniyta llekwiykichisman churaykuychis, hichapis chaywan hatun puririyman chayasun, llaqtanchis makinmanta, wak pak`ariyman, wak k`anchariyman juñulla taripananchispak. Chayta ll`ank`ananchis. Tupak Amaru II, Pedro Willka Apaza, hatun wauk`eyninchiskuna nok`anchismanta mak`anakuqkuna, kamachikunku wak kausayta llank`ananchispak, sichus congresuman chayayta munanchis, llekwinchista rimayman aparina chaypak nok`anchis llank`ananchis musok politicata rimayta, manaña llok`e mistikunak rimayninta puririchisunchu congresomanta pacha.

Tarpuyninchis wakmanta k`allarin, chayrayku kay juñukuy uk`upi kasianchis, kask`allantaqmi wak runakuna, wak rimayniyuq, chaykunatak`a kuska ñanmay aparina. Hatun instrumintu político: FRENTE POLÍTICO PLURINACIONAL sutichask`ata puririchisun k`alan Perú-Tawantinsuyu llaqtanchispak, musok kausaypak p`uturinanpak, kay iskay warank`a uk niyuk watapi.

¡¡KAUSACHUN Ier. CONGRESO DE PUEBLOS “INDÍGENAS”!!
¡¡ KAUSACHUN KECHUA, AYMARA, AMAZONENSES RUNAKUNA!!
¡¡AMA LLULA – AMA K`ELLA – AMA SUWA!!
CHAYLLA NOK`AQ K`ELK`AYNIY K`ANKUNAPAQ

JULLAKA-HANAN KOLLASUYU-TAWANTINSUYU LLAQTAMANTA PACHA, ESK`ON PUNCHAY ENERO KILLAPI, ISKAY WARANK`A CHUNKA UK NIYUQ WATAPI.